Taste陳奕迅的《TASTE the ATMOSPHERE》

aniolsch

　　Eason今年又再一年兩射，事前真係有過擔心佢啲歌「透支」嘅問題，好似上次《Time Flies》咁表現出的疲態、重複。而事實上，從唱片公司乃至Eason本人，也應該意識到呢個問題嘅存在，睇佢哋今回幾乎換過晒啲幕後新血，就知道呢張新碟是要令到聽眾再次體驗，一個不一樣陳奕迅嘅意图目的。
　　
　　變化即從跟薩頂頂合唱的《Welcome to the Future》開始，New Age風貌營造的浩瀚、神秘，是為Eason以前從沒有涉足到的音樂類型，值得鼓勵嘗試，不過讚賞歸讚賞，歌仍是應該講求一個「夾」字，像Eason氣場還欠與薩頂頂的不夾，又或這不按常理的出牌與下文的不夾，都成為《Welcome to the Future》製作精良背後的遺憾。至於拉上了一直都話唔想複出嘅露雲娜演繹的《講男講女》，雖然再次回歸到大家熟悉嘅流行格局，但又顯得咁韻味裊裊，孕著醇香，像永遠都揸唔完裏面啲水嘅海綿，聽極都咁好聽。《葉問風中轉》繼續了林敏聰慣性注入嘅無厘頭，唔夠過癮之餘，仲搞到我覺得有啲厭倦，特別最後上掌門人嗰段，好似見親林敏聰就要諗到「超級無敵馬拉松」咁，新意不新鮮，可講番歌嘅曲、編，Eric Kwok、蘇德華和 Joseph Ip，總算在誇張的神經質嘮叨下完成這輕柔小品一篇，找到了能有記憶度嘅流行與少少出軌出格的中間支點。
　　
　　就音樂而言，《花花世界》營造出如進入世外桃源嘅Chill Out氛圍，實屬出彩，但衰在Eason假音位置的破壞，打擾了整個意境嘅佈置。《我杯茶》一沖即溶的入耳，靠的是方樹樑編曲的奇技，而莫文蔚裝飾性的Featuring，好比不搶味但添層次嘅加糖加奶，屬賣飛佛一杯。《超錯》的懷舊Canton-Rock，保留、披上了幾分滄桑和風霜，惜於潘源良未能將這個很有聯想性嘅題目填好，一語雙關勉強，但都係咁囉，唔得話呢首為平庸作，可是火力仲應該能夠調大一啲。
　　
　　總而言之呢六首全新創作，算係各有千秋，贅肉不多，有人話《TASTE the ATMOSPHERE》在內容上少了份可斟酌的玩味，我卻話其內無太多負擔嘅音樂反而更合我意，正如樂於當中的Eason，不時地給大家的啟示：聽歌啫，又何必一定要聯想得咁多。